لماذا أدون

الصراحة أخوي رمضان عنده مدونة مش بطالة، مع إني بختلف معه في بعض المحتويات... وكل مرة بشوفها بحكي لازم أكتب لي شغلة في مدونتي بس هات إني أفضى وإذا فضيت هات إني أروق للكتابة وإذا رقت من وين بدي أجيب حكي إله معنى زي رمضان أبو صيام


واليوم اتذكرت إني مش فاضي تماما، قصدي من المحتوى، لأني بهالزمانات كنت زلمة شعور، يعني باكتب شعر، فقلت ليش ما أنشر بعض القصائد، منه بطلعها من الجوارير القديمة ومنه بحطلي شغلة عليها العين على مدونتي، يعني زي رمضان السكري


أول ما بلشت أكتب تحيرت أكتب بالإنجليزي ولا بالعربية الفصحى أو المكسرة، ولأني محترف مسنجر عربي ومسجات عربي مع هالغربة في الإمارات ما لقيت حالي إلا بكتب مكسر. احتمال بعد فترة أرجع أحس بالعربية الفصحى واكتب فيها بس خليها تيجي لحالها وبلاش أتكلف، بيكفيني مجهود فكري


بالنسبة للغة الإنجليزية... ما اتخيلت إنه في خواجه أو خواجايه ممكن تهتم تقرأ اللي بكتبه، أما المتخوجنين من ولاد البلد فالله بيعينهم على فك طلاسم لغتهم. على العموم أنا مفكر إني أكتب هاي الكلمات بنهاية كل مقالة بالعربي

If, for any reason, you are interested to read this article in English, I will be happy to send you a personal translation. Just comment on this post and mention your email address

وهيك بكون جمعت المجد من أطرافه... هلأ بالنسبة للحكي المفيد أنا اتذكرت إنه دفاتري القديمة مش معي علشان هيك ممكن المرة الجاي أكشف أول خبيئاتي الشعرية، يالله ومنه بعمل جو من الترقب من هون لحد التدوين القادم

وأهلين بالجميع